147.is

Kristján Helgason er Íslandsmeistari í snóker 2012 eftir 9-1 sigur á Þorra Jenssyni. Hæsta skor Kristjáns í leiknum var í 8. ramma 96. Kristján gaf Þorra litla kosti en þegar það gerðist eins og í 5. ramma kom Þorri sterkur inn, gerði 47, lagði snóker og tók nokkur miss og hreinsaði síðan borðið með skori uppá 20. Kristján hefur átt mjög góðan vetur í snókernum og gerði meðal annars 147 í einu af stigmótunum. Þá má geta þess að þeir Kristján og Þorri verða fulltrúar okkar Íslendinga í Evrópumeistaramóti áhugamanna sem fram fer í Lettlandi í Júní en sigurvegari þess móts kemst inn á atvinnumannaröðina. 147.is mun gera skil þess móts þegar að því kemur. Lokahóf Billiardsambandsins fer fram á Billiardbarnum í kvöld og hefst kl 19:00.

Kristján Helgason, Íslandsmeistari 2011 og Þorri Jensson stigameistari 2011-2012 mætast í úrslitum Íslandsmóts meistaraflokks. Leikurinn fer fram á Billiardbarnum Faxafeni 12 og hefst kl 13:00. Sá sem fyrstur vinnur 9 ramma stendur uppi með titilinn í ár. Mjög góð aðstaða er fyrir áhorfendur.

Það tók Kristján Helgason ekki nema rétt um klukkutíma að vinna Pálma Einarsson 6-0 í 8 manna úrslitum og gerði hann 133 í 5. ramma leiksins. Kristján vann síðan Unnar Braga Bragason 7-1 í undanúrslitum. Unnar Bragi á hrós skilið fyrir framistöðu sína í mótinu en hann vann margfaldan Íslandsmeistarann, Jóhannes B Jóhannesson 6-1 í 8 manna og tók síðan ramma af Kristjáni í undanúrslitum.

Þorri Jensson átti í basli með Brynjar Kristjánsson í 8 manna en hafði leikinn með 6-5 sigri og mætti þá Íslandsmeistara 40 ára og eldri, Gunnari Hreiðarssyni í undanúrslitum sem þá hafði rétt marið hinn stórefnilega Sigurð Kristjánsson 6-5. Þorri var 6-3 yfir og sá fram á sigur í tíunda ramma en gerði regin mistök sem Gunnar nýtti sér og komst í 6-5. Þorri setti sig hins vegar í gírinn í 12. ramma og sigraði 7-5.

Úrslitaleikurinn fer fram á Billiardbarnum, Faxafeni 12 þann 12. maí og má búast við skemmtilegum leik þar sem bæði Kristján og Þorri eru sókndjarfir leikmenn.

Kristján Helgason sýndi að vanda góð tilþrif í leik sínum gegn Gísla Jónssyni í 16 manna úrslitum í dag. Hæsta skor hans var 82 og vann 5-0. Á morgun mætir hann Pálma Einarssyni, sem jafnframt vann sinn leik 5-0. Gríðarleg spenna var yfir leik Unnars Bragasonar og Gary Vinson en í stöðunni 4-4 á litunum í síðasta ramma var gary 26 undir og tóku þeir góðan tíma í varfærið spil á þessum lokaspretti enda báðir vel liðtækir og ekki rétt að gefa of mikinn séns. Unnar hafði þó sigur að lokum og mætir Jóhannesi B Jóhannessyni á morgun. Leikirnir hefjast kl 11:00.

Íslandsmót meistaraflokks hefst á morgun laugardag 05. Maí á Billiardbarnum Faxafeni 12. 16 manna úrslit verða leikin kl 11:00 en 8 og 4 manna verða leikin sunnudaginn 06. Maí. Úrslitaleikur fer hins vegar fram 12 Maí. Úrslit verða fyllt inn í töfluna við lok hverrar umferðar. Áhorfendur eru velkomnir.

Bjarni Már Bjarnason er Íslandsmeistari fyrsta flokks eftir sigur á Kjartani S. Magnússyni 4-1 í úrslitaleik mótsins sem fram fór á Snóker og Pool stofunni síðastliðinn laugardag. Bjarni Már hefur ekki sést í mótum í mörg ár en hefur augljóslega litlu gleymt. Góð þátttaka var í mótinu og margir sterkir mættu til leiks. Riðlarnir og útslátturinn verða settir inn á síðuna í vikunni.

Nú líður að Íslandsmóti meistaraflokks sem fer fram á Billiardbarnum næstu tvær helgar. Þann 05. maí verða leikin 16 manna úrslit, 06. maí 8 og 4 manna en úrslitaleikurinn fer fram þann 12. maí.

Gunnar Hreiðarsson er Íslandsmeistari 40+ 2012 eftir 7-5 sigur í úrslitaleik á móti stigameistaranum Brynjari Kristjánssyni. Gunnar var 6-1 yfir en Brynjar kom sterkur inn í áttunda rammann og vann næstu fjóra ramma en laut að lokum í lægri hlut. Brynjar átti hæsta skor í leiknum, 59 en Gunnar átti hins vegar hæsta skor í mótinu, 73

Íslandsmót fyrsta flokks fer fram 28-29 apríl á Snóker og Pool stofunni Lágmúla 5 og hefst kl. 11:00. Mótið er opið öllum þeim sem hafa hug á en er þó lokað fyrir leikmenn sem eru í 16 efstu sætum opins flokks þessa tímabils og leika þar af leiðandi í Íslandsmóti meistaraflokks. Þátttökugjald er 6.000,- kr fyrir þá sem ekki hafa tekið þátt í stigamótum í vetur. „Bleiki“ bílasalinn Guðni Pálsson á titil að verja en heyrst hefur af mörgum sterkum leikmönnum sem ætla sér að mæta.

Óskar Kristinsson, til hægri á myndinni, stóð uppi sem sigurvegari í fyrsta Íslandsmóti fyrir 67 ára og eldri sem haldið er í snóker hér á landi. Það gekk frekar brösuglega hjá honum í riðlinum en hann setti sig í gírinn í undanúrslitum gegn Kristjáni Egilssyni, 2-0 og vann síðan Hörð Finnsson í úrslitum 2-1.

Í fyrsta skipti í sögu snókers á Íslandi verður haldið Íslandsmót fyrir 67 ára og eldri. Þeir eru þó nokkrir á þeim aldri sem spila snóker og sumir hverjir nokkuð slyngir. Mótið fer fram á Billiardbarnum Faxafeni 12 og hefst kl 11:00. Mótið er opið öllum þeim sem hafa náð þessum aldri og eru áhorfendur jafnframt velkomnir.